Endurútgáfur

Endurútgáfur á gömlum íslenskum lögum er algerlega málið í dag !
Fyrir c.a tveimur árum síðan gáfu KK og Maggi Eiríks út plötuna 22 Ferðalög sem sló í gegn og seldist í 14 þúsund eintökum á því árinu. Síðan þá hefur hver "listamaðurinn" séð sér leik á borði og viljað taka þátt í gullæðinu, t.d gaf hljómsveitin Á Móti Sól út diskinn 12 Íslensk Topplög í fyrra sem seldist eins og nýbakaðar pönnukökur, enda innihélt diskurinn gamla hittara eins og : Fram á nótt, Sagan af Nínu og Geira, Sirkus Geira Smart, Rómeó og Júlía, Traustur vinur, Ég fann þig, Ég veit þú kemur og Eitt lag enn.
Þetta getur bara ekki klikkað, og gerði það auðvitað ekki, og viti menn og konur í sumar kom svo út ný plata frá þeim sólar andstæðingum sem bar heitið Hin 12 Topplögin og innihélt gamla smelli eins og : Þú og ég, Þrisvar í viku, Lítill drengur, Hjálpaðu mér upp, Afgan, Bíólagið og Fyrsti kossinn. Skotheld plata sem rokselst og ekki má gleyma að böllin með bandinu eru nú orðin stútfull af klassíkerum sem yngri ballgestir tengja beint við viðkomandi hljómsveit en ekki upprunalegu flytjendurna, sem er auðvitað hið bezta mál.
Svo kom auðvitað út í sumar önnur plata með KK og Magga sem heitir Fleiri Ferðalög og gerir út á nákvæmlega sama markaðinn og síðast, og auðvitað rokselst platan enda vel heppnuð eins og forverinn.
Svo má auðvita minnast á gríðar velheppnaða plötu Guðrúnar Gunnarsdóttur þar sem tekin eru fyrir lögin sem eftirlætis söngkona þjóðarinnar Ellý Vilhjálms gerði ódauðleg. Plata Guðrúnar seldist í kílómetra vís og uppselt var á fjölmarga tónleika Guðrúnar þar sem flutt var sama efni. Svo er bara spurning hvort að ekki sé til næjanlega mörg lög til að gera framhaldsplötu ?
Nylon gellurnar eru svo búnar að mjólka þennan sama spena duglega, og allt Idol liðið er líka að hamast við að endurgera gamalt efni og svona má lengi telja.
Þá er svo sem hægt að tala um þá sem gera út á erlent efni eins og stór söngvarinn Páll Rosinkranz sem er í tónlistarlegu "copy paste" og hinn margreyndi Björgvin Halldórs sem hefur alla tíð með einstaka undantekningum þó tekið erlend lög og gert við þau íslenska texta með góðum árangri. Er þó jólatónlistin frá Bo Hall kapituli útaf fyrir sig en Bo er einstaklega duglegur að gera vinsæl Ítölsk popplög að Íslenskum jólahitturum, enda er maðurinn bara scnillingur, respect.



Satan.