Úff hvað getur maður sagt eftir svona tónleika ?
Ég var að koma heim af tónleikum Sigur Rosar í Laugardalshöll, og er í hálfgerðri vímu....nei ég fékk mér ekkert hugvíkkandi á tónleikunum nema smá bjór, þannig að ekki var það sú víma sem ég finn fyrir.
Líklegra er að það séu bara þessir snillingar í Sigur Ros sem hafa þessi áhrif á mann.
Þeir spiluðu í u.þ.b. 2 og hálfan tíma og misstu ekki takið á manni allan tímann, tóku lög af síðustu þremur plötum sínum og þó svo að ég geti ekki nafngreint helminginn af þeim þá get ég nefnt að af Ágætis Byrjun voru tekinn lögin: Ný Batterí, Viðrar vel Til Loftárása og Olsen Olsen, af nýju plötunni Takk voru auðvitað flest lögin og voru þau meðal annars: Hoppípolla, Glósóli, já og líklega bara restin af þeirri plötu og af plötunni ( ) man ég bara eftir lagi númer eitt.
Fyrir tónleikana hitaði stúlkna strengjasveitin Amina upp tónleikagesti sem voru víst eitthvað yfir 5000 talsins, en þó ekki alveg uppselt sem ég er frekar hissa á, einnig voru hljómsveitinni til aðstoðar 9 manna blástursleikarar og svo tóku þær Amina stúlkur stóran þátt í flutningi litlu álfadrengjanna.
Þá verður að minnast á einfaldan en áhrifaríkan þátt ljósameistara þessara tónleika, en erfitt er að lýsa því með orðum, en þar var vel að verki staðið og átti stóran þátt í þeirri tilfinningu sem hríslaðist um mann alla tónleikana.
Sándið var gríðarlega gott og gerði tónlist drengjanna góð skil þar sem lögin eru allt frá angurværum rólegheitum og yfir í þungt og kraftmikið dúndur.
Það er sem sagt alveg á hreinu að ég er gríðarlega ánægður með kvöldið og enn sannfærðari að hér eru snillingar á ferð og að lokum getur maður bara sagt frá innstu hjartarótum.......TAKK.
Satan.
